BankNordik: Avlopið í ár verður 200-240 mió. kr.

Eftir at fyrsti ársfjórðingur er farin afturum, heldur leiðslan í BankNordik fast um, at úrslitið í ár verður 200 til 240 milliónir krónur brutto. Bankin væntar at skulu strika færri lán í ár enn í fjør, t.e. at niðurskrivingarnar verða færri í ár.

BankNordik hevði 31 mió. kr. í vinningi fyri skatt í fyrsta ársfjórðingi, kunnger bankin í dag. Inntøkurnar av rakstrinum hjá BankNordik-samtakinum vóru 190 mió. kr. í fyrsta ársfjórðingi. Tað var í minna lagi, tí eftirspurningurin eftir lánum og kredittum er framvegis lítil. Harafturat ávirkar hørð kapping um útlánsrentuna rentumarginalin, ikki minst í Føroyum. 

Rinda lán aftur

Harafturímóti helt jaliga gongdin í danska bankavirkseminum hjá BankNordik fram í fyrsta ársfjórðingi, sigur bankin í tíðindaskrivi.Í hesum ársfjórðinginum, tað var tann 23.apríl, rindaði BankNordik 63 milliónir krónur aftur av ábygdarláninum frá danska statinum. BankNordik hevur nú minkað síni ábyrgdarlán niður í 460 mió. kr. 

Við ársenda í 2011 vóru ábyrgdarlánini 831 mió. kr.