- Tíðindi, mentan og ítróttur
Lars Løkke Rasmussen missir veljarar
![](https://kvf.fo/sites/default/files/styles/grein-ovasta-mynd/public/ddf69b7694dd35b3e953f296eb299c29.png?itok=9yIl83A_)
Danski Vinstri-flokkurin missir framvegis veljarar, og nú er flokkurin triðstørstur í Danmark, aftanfyri Javnaðarflokkin og Danska Fólkaflokkin.
Tað vísir ein nýggj kanning sum Voxmeter hevur gjørt.
Kanningin vísir eisini, at nú er borgarligi vongurin bert fimm fólkatingsumboð frammanfyri vinstravongin.
Eftir kanningini hevði Javnaðarflokkurin fingið 41 umboð, Danski Fólkaflokkurin 37 umboð, og Vinstri 35 umboð, um val var nú.
Danski Fólkaflokkurin hevur ongantíð fyrr staðið so sterkur í eini veljarakanning.
Tey fýra umboðini úr Føroyum og Grønlandi eru ikki tald við í kanningini. Verða tey tald við, so eru bert tvey fólkatinsumboð á muni ímillum bláa veingin og reyða veingin.
Fyri einum mánað síðani var Vinstri flokkurin nógv størsti flokkurin í donskum politikki. Og tá stóð blái vongurin til at fáa 97 umboð í fólkatingið, meðan reyði vongurin stóð til at fáa 78 umboð.