Sigur seg hava vunnið forsetavalið í Afganistan

Forseta-valevnið Abdullah Abdullah sigur seg hava vunnið forsetavalið í Afganistan, sum varð hildið í juni mánað. Tó vísa fyribils úrslit, nú upptalt verður, at mótvalevnið Ashraf Ghani er á odda.

Abdullah Abdullah segði í eini røðu fyri viðhaldsfólki, at valið var merkt av sviki.

Amerikanski uttanríkisráðharrin John Kerry hevur fyrr ávarað ímóti, at okkurt av valevnunum ella onkur politiskur flokkur sær sær ein møguleika at taka valdið, og sagt verður um Abdullah Abdullah, at hann er ein teirra, ið skal hava slíkar ætlanir.

Meðan spenningur er um úrslitið av forsetavalinum, er ein bumba brostin uttanfyri høvuðsstaðin Kabul. Sekstan fólk doyðu - teirra millum fýra Nato hermenn.

Trý sivilfólk og tveir løgreglumenn hava latið lív í einum álopi nærhendis Bagram, har USA hevur størstu hermannalegu sína í Afganistan.