Flogfelagið Cimber gevst við virksemi sínum

Danska flogfelagið, Cimber, sum hjálpti føroyingum at seta á stovn Atlantic Airways gevst nú við virksemi sínum.

Orsøkin er, at avtalan, sum Cimber seinastu 10 árini hevur havt við SAS, er uppsøgd frá fyrsta apríl næsta ár. Tí steðgar alt virksemi hjá flogfelagnum, sigur Jørgen Nielsen, stjóri í Cimber.

Starvsfólkini, - tey eru 130 í tali, fáa í dag og í morgin ætlanarskriv um uppsøgn. 

Kanna møguleikar at halda fram

Jørgen Nielsen vísur á, at felagið hevur arbeitt út frá langtíðarbíleggingum, og tí vil hann ikki vísa aftur, at felagið fer at halda fram eftir fyrsta april.

- Tað velst um, um vit fáa nakra langtíðar bílegging, sigur hann. - Nú verður farið út á marknaðin at kanna, hvørjar uppgávur felagið kann bjóða seg fram til.

Spurdur, hví SAS segði upp avtaluna, sigur Jørgen Nielsen, at møguliga hevur SAS viljað havt størri flogfør.