Fýra vikur í varðhaldi fyri byrsuhóttan

Maðurin varð tikin í Miðvági í gjár, eftir at politiið hevði jagstrað hann, tí hann var undir illgruna fyri at koyra ávirkaður. Við vegjaðaran á einum uppdyrkingarvegi í Miðvági tók maðurin eina byrsu, sum var lødd, og hótti løgreglumenninar, hava teir upplýst. 

Sjálvur segði hann í rættinum, at hann ikki hótti nakran, men at hann tók patrónirnar úr byrsuni, tá hann sá hana liggja við vegin.

Hví byrsan lá við síðuna av uppdyrkingarvegnum, og hví hann hevði eitt patrónbelti hjá sær, segði hann seg ikki vita, tí hann var ávirkaður.

Fleiri mál

Fleiri mál vórðu reksað upp, tá maðurin var fyri í grundlógaravhoyring.

Hann skal hava gjørt seg inn á løgreglufólk minst tvær ferðir, hann skal hava roynt at seta eld á eitt ruskílat í Sørvági, og hann skal hava brotið rútar í húsum hjá fólki.

Drukkið illa

Ungi maðurin hevur framvegis arbeiði, men fyri seks til sjey mánaðum síðani byrjaði hann at drekka væl meir enn vanligt, og seinastu seks til sjey vikurnar hevur hann drukkið hvønn dag, greiddi hann rættinum frá.

Síðani tá hevur hann bert verið til arbeiðis av og á, men seinastu vikuna hevur hann als ikki arbeitt, tí hann var fullur alla tíðina.

Sum hann sjálvur segði, so hevði hann sovið meir í einum kliva á politistøðini í Klaksvík, enn hann hevði sovið heima hjá sær sjálvum seinastu tíðina.

Fleiri vápn

Løgreglan hevur eisini funnið onnur vápn hjá manninum, m.a. eina byrsu aftrat og knívar.

Verjin helt ikki, at maðurin hevði hótt nakran, í øllum førum visti hann ikki av tí. Og verjin vísti á, at ungi maðurin ikki er revsaður fyrr.

Verjin helt eisini, at maðurin átti at verið latin leysur, og í øllum førum ikki at verið varðhaldsfongslaður í fýra vikur, sum ákæruvaldið kravdi.

Varðhaldsfongslaður

Dómarin var ikki samdur. Hon vísti á, at maðurin hevði framt tvey sama slag brot í somu viku, og at hann nýtti rúsdrekka dagliga.

Tí varð hann varðhaldsfongslaður í fýra vikur.

Maðurin kann kæra ta avgerðina, men tað verður ikki gjørt, upplýsti verjin.