Fekk heldur ikki endurgjald í Landsrættinum

Suðuroyar sjúkrahús er eisini frídømt í Eystara landsrætti í einum sakarmáli um endurgjald.

Landsrætturin staðfesti í morgun dómin hjá Føroya rætti frá mars 2011.

Ein maður, sum í 2005 misti høgra undirarm av krabbameini, stevndi eftir 900.000 krónum í endurgjaldi.

900.000 kr. svara til endurgjaldið fyri 70 prosent avlamni.

Men Suðuroyar sjúkrahús skal ikki rinda endurgjald, hóast danska Sjúklingakærunevndin einmælt avgjørdi - og Rættarlæknaráðið segði tað sama - at yvirlæknin, sum viðgjørdi mannin, ikki gjørdi sítt arbeiði til lítar.  

Ikki prógvað

Føroya rættur segði, at tað er ikki prógvað, at maðurin var sloppin undan at missa armin, um yvirlæknin stívliga eitt ár frammanundan setti armin undir regluligt eftirlit.

Maðurin vildi hava dómsvaldið at geva sær viðhald í, at vantandi eftirlitið hjá yvirlæknanum á Tvøroyri var orsøkin til, at hann misti undirarmin. Og tí eigur sjúkrahúsið at bøta fyri tað og rinda honum endurgjald.

Maðurin var 38 ára gamal, tá armurin varð tikin.