Kanna loysn við tveimum giktalæknum

Í løtuni verður ein loysn kannað, har tveir giktalæknar kundu skiftst um at veitt neyðugu viðgerðina, sigur Karsten Hansen, landsstýrismaður, í svari til Bjørt Samuelsen, løgtingskvinnu, sum spurdi um viðurskiftini, eftir at giktalæknin, Pero Sore, hevur sagt seg úr starvi.

Karsten Hansen sigur í svarinum, at tað verður arbeitt við at finna eina loysn, og ein loysn verður sett í verk í seinasta lagi 1. januar. Landsstýrismaðurin upplýsir í svarinum, at giktalæknin ikki hevur nakra grundgeving í uppsøgnini, men at leiðslan á Landssjúkrahúsinum samskiftir við giktalæknan.

SÍ EISINI Giktalæknin á Landssjúkrahúsinum gevst

Eingin niðurstøða er gjørd enn og fundur verður aftur í næstu viku. Sambært sjúkrahúsálitinum frá 2007, verður sagt, at tørvur er á tveimum giktalæknum í Føroyum.

Tí verður umhugsað at seta tveir giktalæknar í starv, tí tað hevur víst seg, at tað er lættari at fáa fólk at søkja, um ein ella fleiri serlæknar eru frammanundan, sigur Karsten Hansen í svarinum til Bjørt Samuelsen.