Nýtt rættarmál móti al-Jazeera journalistum

Hægsti rættur í Egyptalandi hevur avgjørt, at rættarmálið móti trimum journalistum hjá sjónvarpsrásini al-Jazeera skal ganga umaftur. Ein teirra er avstralski Peter Greste, ið framman undan arbeiddi fyri bretska kringvarpið BBC.

Al-Jazeera journalistarnir vórðu handtiknir í desember mánað 2013 - skuldsettir fyri at hava borið rong tíðindi og fyri at hava veitt einum bannaðum felagsskapi stuðul. Talan er um Muslimska brøðralagið, flokkin hjá frákoyrda forsetanum Mohammed Morsi, sum herurin setti frá valdinum.

Tá dómur fall í juni mánað fingu Peter Greste og Mohamed Fahmy sjey ára fongsul hvør og Baher Mohamed fekk tíggju ára fongsul.

Dómurin ber álvarslig brek

Journalistarnir hjá al-Jazeera hava alla tíðina hildið fast um, at tað einasta teir hava gjørt er at siga frá tí, sum hendi kring forsetaskiftið og frá tí ófriði, sum var millum viðhaldsfólk og mótstøðufólk hjá Muslimska brøðralagnum.

Verjarnir siga, at ákæruvaldið nú hevur viðurkent, at dómurin ber álvarslig brek. Eitt nýtt rættarmál fer at verða hildið innan ein mánað, men hesa tíðina verða teir tríggur journalistarnir sitandi í varðhaldi.

Sjónvarpsrásin Al-Jazeera hevur hinvegin heitt á egyptisku myndugleikarnar um at lata journalistarnar leysar sum skjótast.