Ferðaseðlaprísir kunnu hótta flogtrygdina

<p>Lágprísflogfeløg í Indonesia skulu ikki hava loyvi at selja ferðaseðlar so bíliga, at teir at kalla verða latnir fyri einki. Tað upplýsir ein talsmaður fyri flutningsmálaráðið í Indonesia, sambært tíðindastovuni DPA.</p>

<p>Í framtíðini skal ein ferðaseðil kosta í minsta lagi 40 prosent av dýrasta ferðaseðlaprísinum. Tað skal forða fyri prískríggi millum flogfeløgini, sum kann raka flogtrygdina, verður sagt.</p>

<p>Boðini koma 10 dagar eftir, at eitt flogfar hjá lágprísflogfelagnum, Air Asia, datt niður í Java-havið, tá tað var á veg úr Indonesia til Singapore 28. desember. Enn er ikki staðfest endaliga, hví flogfarið datt niður, men einki bendir á, at vánalig trygd var atvoldin.</p>

<p><strong>Svørtu kassarnir kanska funnir</strong></p>

<p>Ein fyrrverandi stjóri fyri indonesisku loftferðslumyndugleikarnar sigur, at eingin munur er á mannagongdini í sambandi við trygd hjá lágprísflogfeløgum og øðrum flogfeløgum.</p>

<p>Í morgun, okkara tíð, kunngjørdu bjargingarmyndugleikarnir, at velið á flogfarinum er funnið umleið 30 kilometrar, haðani tað datt niður.</p>

<p>At velið er funnið, hevur stóran týdning, tí har eru svørtu kassarnir eisini, og teir kunnu loysa gátuna, hví flogfarið datt niður. Øll 162 fólkini, sum vóru við Air Asia-flogfarinum, doyðu.</p>