Einki høpi í útrokningum hjá Edmundi Joensen

<p>Edmund Joensen, fólkatingsmaður fyri Sambandsflokkin, er nú eisini farin uppí kjakið um, hvørt vit í Føroyum skulu taka ímóti flóttafólki ella ikki.</p>

<p>Í einum tíðindaskrivi, ið var sent miðlunum í gjár, sigur Edmund Joensen, at tað fer at kosta landskassanum 160 milliónir krónur um árið at taka ímóti flóttafólkum. Hetta byggir fólkatingmaðurin á tøl frá Rockwool-grunninum. Kringvarpið hevur hugt nærri at útrokningunum hjá Rockwool-grunninum, og tað vísir seg, at onki høpi er í útrokningunum hjá fólkatingsmanninum.</p>

<p>Útrokningin hjá Rockwool-grunninum byggir á tøl fyri allar tilflytarar frá ikki-vestanlondum - bæði flóttafólk og vanligir tilflytarar. Tølini eru altso ikki reinsaði fyri flóttafólk. Eisini vísir greiningin hjá Rockwool-grunninum, at um vit hyggja at tølunum fyri allar tilflytarar, t.e. bæði úr vestanlondum og ikki- vestanlondum, so eru tilflytararar ein nettoinntøka hjá danska statskassanum.</p>

<p>Ein útrokning hjá føroyska landsstýrinum frá 1999 vísir, at tað kostar umleið 12 milliónir krónur um árið at taka ímóti 50 flóttafólkum. Altso næstan 150 milliónir krónur minni enn tað Edmund Joensen, fólkatingsmaður fyri Sambandsflokkin, sigur í tíðindaskrivinum í gjár. Hetta tal skal tó takast við størsta fyrivarni, tí nógvir faktorar kunnu ávirka kostnaðin av flóttafólkum.</p>

<p>Til ber at lesa frágreiðingina hjá Rockwool-grunninum <a href="http://www.rockwoolfonden.dk/publications/immigration+and+integration/pu... target="_blank">her</a>.</p>