Endurgjald fyri ferðsluóhapp hækkar nógv

Ferðsluóhapp ella vanlukkur, har sum nógv fólk fáa skaða ella doyggja, fara at kosta tryggingarfeløgunum nógv meira enn nú.

Hámarkið fyri fólkaskaða fer úr 50 milliónum í heildar endurgjaldi upp í 114 milliónir krónur.

Fyri skaddar lutir hækkar endurgjaldið úr tíggju milliónum  upp í 23 milliónir krónur.

Hækkingarnar eru í uppskoti um at broyta ferðslulógina, sum Vinnumálaráðið hevur sent til hoyringar.

Sama sum í Danmark

Endurgjaldið verður nú tað sama sum í Danmark. 

Tølini vóru eina ferð tey somu í Danmark sum tey eru í Føroyum nú, men í Danmark verða tølini javnað hvørt ár, tey hækka hvørt ár. Í Føroyum eru tølini ikki javnað. Men tað verða tey sambært lógaruppskotinum.

Aðrar broytingar viðvíkjandi tryggingini eru eisini skotnar upp, millum annað um próvbyrðuna hjá tí, sum elvir til skaðan og tí, sum fær skaða.