YouTube er nýggja sjónvarpið

Videobrot á YouTube, har tú sært fólk spæla telduspælið Minecraft, eru ógvuliga væl umtókt. So mikið væl, at heitið á telduspælinum er blivið næstmest brúkta leitiorðið á YouTube, skrivar BBC.

Serliga eru tað børn og ung úr øllum heiminum, sum sita í tímavís og fylgja við, hvussu aðrir Minecraft fjepparar spæla telduspælið. Tað sermerkta við hesum videobrotunum er, at fjeppararnir vísa ikki einans, hvussu teir spæla, men teir greiða eisini frá samstundis.

Foreldur øtast

Nógvu tímarnir á YouTube hava fingið fleiri foreldur at Minecraft fjepparum at øtast, tí telduspælið og videobrotini á Youtube fara við ov nógvari tíð.

Men foreldur eiga ikki at óttast, heldur Bec Oakley, ið hevur internetblogguna Minemum, sum hjálpir foreldrum, hvørs børn brúka nógva tíð upp á Minecraft.

- YouTube er fyri hesa generatiónina, sum sjónvarpið var fyri okkum. Tað er soleiðis, børnini í dag vilja verða undirhildin, læra og deila við onnur. Tá tey hyggja eftir videobrotunum, har onnur spæla Minecraft, fáa tey betri vitan um spælið, og sostatt kunnu tey deila sína vitan við onnur børn, sigur Bec Oakley við BBC.

Ávara um spælið

Sálarfrøðingar, ið hava granskað í spælinum, eru ikki eins bjartskygdir um Minecraft og videobrotini á YouTube. Í eini grein í Quartz Magazine blivu foreldur at Minecraft fjepparum ávarað um spælið.

- Hóast tað kann tykjast, sum børnini eru kreativ og læra nógv við sjálvi at spæla Minecraft og eisini síggja onnur spæla og greiða frá, so søgdu tey børnini, vit høvdu við í okkara granskingarverkætlan um Minecraft, at tey vóru snarsint og erkvisin, tá tey høvdu spælt spælið, siga sálarfrøðingarnir Jun Lee og Robert Pasin.