Reiðarar og fiskimenn gjørt nýggjan sáttmála

Reiðarafelagið og Fiskimannafelagið eru samd um nýggjan sáttmála, sum verður galdandi til 1. apríl í 2017.

Av tí at Reiðarafelagið framvegis er í samráðingum við Maskinmeistarafelagið og Skipara- og Navigatørfelagið, og fleiri viðurskifti eru felags, vil Fiskimannafelagið ikki almannakunngera samlaða úrslitið av samráðingunum.

Eftir at manningarfeløgini slakaðu nógv í 2011, eru nøkur viðurskifti aftur fingin í rættlag, skrivar formaðurin í Fiskimannafelagnum á heimasíðuni hjá felagnum.

Býtisprosent og línugjald

Við nýggju semjuni er býtisprosentið hjá botnfiskatrolarunum aftur tað, tað var í 2011, línugjaldið er strikað, dagískoytið, sum kokkar fáa fyri at proviantera, hækkar, og menn, sum sigla fast við ávísum skipi ella hjá ávísum reiðaríi, fáa eina upphædd um árið sum ískoyti til arbeiðsklæði. 

Eisini hevur nýggja semjan við sær, at fiskimenn í heimaflotanum nú umframt jólaaftan og jóladag eisini eru tryggjaðir frí ANNAN jóladag, og nýggjar orðingar tryggja bæði fastari manning og avloysarum tryggari og greiðari setanarviðurskifti.

At sáttmálasemjan er galdandi til 1. apríl 2017 kemur av, at tað seinastu árini hevur verið vanligt, at Reiðarafelagið hvørt ár undan jólum og um nýggjársleitið er upptikið av millumlanda fiskivinnusamráðingum. Tí samdust partarnir um at flyta sáttmálaskeiðið.