Lágur oljuprísur sæst aftur í innflutninginum

Innflutningurin fyrstu sjey mánaðirnar í ár var 347 milliónir kr. minni, enn somu tíð í fjør, vísir ein uppgerð hjá Hagstovuni.

Lági oljuprísurin ger stóran mun, tí innflutningurin av brennievni minkaði við 182 milliónum kr., svarandi til 26 prosent.

Innflutningurin av flogførum og skipum minkaði við 85 prosentum, og av maskinum og amboðum við einum triðingi.

Harafturímóti vaks innflutningurin av rávøru til fiskavirking við 52 prosentum, og innflutningurin av bilum vaks við 21 prosentum, vísir uppgerðin hjá Hagstovuni.