Tórshavn Radio gevst við skipssamrøðum

Nýggja, tøkniliga menningin hevur við sær, at nærum eingin tørvur longur er á tænastuni at avgreiða skipssamrøður, skrivar MRCC á heimasíðuni.

Meðan Tórshavn Radio áður hevði tvey vaktarsett fólk, ið tóku sær av at avgreiða samrøður frá skipunum, er tað talið minkað niður í nærum einki.

Í fjør avgreiddi Tórshavn Radio fimm samrøður tilsamans, meðan seks samrøður higartil í ár eru farnar umvegis Tórshavn Radio.

Neyð- og trygdartænastan kemur tó at halda fram, eins og tøkniligi møguleikin at stilla samrøður um frá skipum til telefonir á landi eisini verður varðveittur, skrivar MRCC.