Tsipras varðveitir stjórnarvaldið í Grikkalandi

Alt bendir á, at vinstrahalli flokkurin Syriza hjá Alexis Tsipras, forsætisráðharra, fer at varðveita stjórnarvaldið í Grikkalandi eftir valið í dag.

Seks kanningar, sum vórðu kunngjørdar fyri midnátt fríggjakvøldið, vísa, at Syriza liggur á odda við hálvum triðja prosentstigi.

Einki verður at frætta aftur um valið, fyrr enn kanningar verða gjørdar á valstøðunum í kvøld, tí í Grikkalandi er ikki loyvt at gera veljarakanningar dagin fyri valið. 

Seinastu vikurnar hava Syriza og konservativi andstøðuflokkurin, Nýtt demokrati, róð borð um borð í veljarakanningunum, men eru tær seinastu kanningarnar eftirfarandi, varðveitir Tsipras stjórnarvaldið.

Ikki avgjørdan meiriluta

Hóast Syriza vinnur valið, fær flokkurin neyvan avgjørdan meiriluta í tinginum. Tí noyðist Tsipras helst at samstarva við aðrar flokkar.

Politiskir eygleiðarar í Athen gita, at hann fer at samstarva við sosialistiska flokkin, Pasok, og miðflokkin, Potami. Tsipras hevur víst aftur at samstarva við Nýtt demokrati.

Sama, hvør samgongan verður, verður tað ein herskin biti hjá viðhaldsfólkunum, tí bæði Pasok og Nýtt demokrati verða lagdir undir at hava ábyrgdina av búskaparliga óskilinum í Grikkalandi í mong ár.

Noyddist at gera avtalu

Á valinum í januar vann Syriza stórsigur, tí Tsipras lovaði veljarunum, at nú skuldi støðan broytast. Men endin varð, at forsætisráðharrin noyddist at skriva undir triðju lánsavtaluna um tilsamans 642 milliardir krónur, til tess at forða fyri, at Grikkaland skuldi fara av knóranum og burtur úr evrusamstarvinum.

Afturfyri skal landið seta strong búskaparlig tiltøk í verk og fremja víðfevndar nýskipanir. 

Ein fólkaatkvøða var um nýggju lánsavtaluna, og hon vísti, at grikkar søgdu kortanei. Kortini skrivaði Tsipras undir avtaluna, og tað hevði við sær, at Syriza fór í tvíningar, og tey, sum tóku seg úr flokkinum, stovnaðu nýggjan flokk.