Fátækradømið í heiminum so lítið sum ongantíð áður

Tað boðar Heimsbankin frá. Markið fyri, nær fólk liva í ógvusligum fátækradømi, hevur Heimsbankin sett til 1,9 amerikanskar dollarar um dagin, slakar 13 krónur. Áður hevur markið verið 1,25 dollarar, 8 kr og 30.

Talið av fátøkum í hesum lægsta inntøkubólkinum er minkað úr 12,8 prosentum í 2012 niður í 9,6 prosent í ár. Tó sigur Heimsbankin, at gongdin sunnan fyri Sahara í Afrika vekir stúran.

Hóast forsagnirnar hjá Heimsbankanum siga, at ringa fátækradømið í hesum øki í Afrika fer at minka úr 46,6 prosentum í 2012 niður í 35,2 prosent við árslok í ár, telja hesi fólk umleið helvtina av heimsins fátæku.

Árin frá veðurlagsbroytingum merkjast

- Vit eru fyrsta ættarlið í menniskjans søgu, sum kunnu fáa ringa fátækradømið at enda, sigur Jim Yong Kim, ið er forseti í Heimsbankanum, við BBC.

Góða gongdin kemst av stórum vakstrartølum í menningarlondunum og íløgum í útbúgving, heilsu og sosial trygdarnet.

Tó ávarar Jim Yong Kim um, at torført verður at koma longur fram á leið í stríðnum at basa ringasta fátækradøminum. Altjóða vøksturin minkar, tí stríð valdar í fátøkum londum, og at ring árin frá veðurlagsbroytingum eru farin at merkjast.