Ráðhúsið í Hetlandi veittraði við Merkinum á ólavsøku

Í juli samtykti Hetlandsráðið, at frameftir verður flaggað við Merkinum frá býráðshúsinum í hetlendska høvuðsstaðnum Lerwick.

Ólavsøkudag legði Hetlandsráðið mynd út á sosialar miðlar, har Merkið sæst veittra frá torninum á ráðhúsinum í hetlandska høvuðsstaðnum Lerwick. Í samband við myndina verður sagt, at "Í dag verður flaggað við føroyska flagginum frá Býráðshúsinum í samband við tjóðardagin hjá Føroyum, okkara vinum og grannum." Teksturin endar við, at tey ynskja øllum eina góða ólavsøku.

Politiskt er Hetland skipað sum ein kommuna við einum kommunustýri. Og kommunustýrið eitur á enskum Shetland Islands Council, ella Hetlandsráðið á føroyskum.

Hetlendingar hava reglur um, hvussu flaggað verður frá býráðshúsinum í Lerwick. Vit kunnu nevna, at 21. juni, sum er hetlendskur flaggdagur, verður flaggað við hetlendska flagginum.

30. novembur, sum skotskur tjóðardagur, verður flaggað við skotska flagginum.

17. mai, sum er norskur tjóðardagur, verður flaggað við norska flagginum.

Og so hevur Hetlandsráðið nýliga gjørt av, at á ólavsøku verður flaggað við Merkinum.