Ommubørn kunnu fáa astma um omman roykti

Gransking gevur ábending um, at børn hava upp í 40 prosent størri sannlíkindi fyri at fáa astma, um omma teirra roykti, tá hon var við barn, skrivar ScienceNOrdik.

Alsamt fleiri fáa astma, og tí royna granskarar at finna svarið, hvat ger, at tað er so. Og nú hava granskarar lagt fram ástøði um, at royking hjá ommuni hevur avleiðingar fyri næsta ættarliðið.

- Fyri at skilja astma-umfarstóttina er neyðugt at vit betur skilja, í hvønn mun lívlanga eksponeringin kann hava ávirkan á sjúkuvandan fyri komanid ættarlið, sigur Caroline Lodge, postdoc í tíðindaskrivi.

Ymiskt eftir aldrinum hjá børnunum

Úrslitini frá kanningini vísa, at børn, sum fingu astma eftir at tey vóru trý ára gomul, ikki eru ávirkað av roykivanum hjá ommuni.

Børn, sum fingu astma tíðliga og framvegis líða undir tí tá tey vóru fýra til sjey ára gomul, vóru upp í 40 prosent størri vanda at fáa astma, um omma teirra roykti. Hetta fevnir eisini um tey, har mamman ikki roykti meðan hon gekk full uppundir hendir.

- Vit síggja, at roykivanar hjá ommum hava dupult so stóran týdning fyri astma í barnaárum, sum roykivanarnir hjá mammuni, sigur Beril Forsberg, professari við lærda háskúlan í Umeå í Svøríki, har kanningarnar vóru gjørdar.