Kunnu ikki leita eftir kavbátum í danska ríkinum

Gerst neyðugt at leita eftir fremmandum kavbátum, noyðist Danmark at biðja um hjálp frá øðrum NATO-londum, sigur verjumálaráðharrin, Peter Christensen, við Berlingske Tidende.

Blaðið viðgjørdi um vikuskiftið fremmandar kavbátar í sjónum í danska ríkinum. Berlingske hevur leitað fram 15 fráboðanir um kavbátar við Grønland síðani 1980.

Eingin fráboðan úr Føroyum

Í 2006 varð boðað frá einum fremmandum kavbáti í einum fjørði norðan fyri Paamiut. Myndugleikarnir søgdu, at fráboðanin var álítandi og eftirfarandi.

Eingin fráboðan um fremmandar kavbátar við Føroyar er nevnd í blaðnum. Men Grønland hevur serligan áhuga, nú norðurpólsleiðin hevur so stóran áhuga hjá nógvum londum, eitt nú Russlandi.

Danska verjan hevur ikki sonarútgerð, sum krevst, tá skip ella tyrlur leita eftir kavbátum. Útgerðin er spard burtur. Tað eru bumbur, sum verða brúktar móti kavbátum, eisini.

Nýggjar tyrlur kunnu leita eftir kavbátum

Danmark hevur ongar kavbátar. Tær níggju Sea Hawk tyrlurnar, sum Danmark fær næstu árini, eru bygdar til at leita eftir kavbátum.

Men Danmark hevur kortini ikki biðið um at fáa tyrlurnar útgjørdar til at leita eftir og finna kavbátar, skriva Berlingske Tidende.

Í donsku politisku verjusemjuni, sum er galdandi árini 2013-2017, er ikki lagt upp fyri leiting eftir kavbátum. Men Danmark eigur altíð at laga seg eftir altjóða avbjóðingum, sigur verjumálaráðharrin, Peter Christensen, við blaðið.