Ráðharrar umrøða hert eftirlit

Innanríkis- og løgmálaráðharrarnir í ES londunum eru í skundi kallaðir saman í Brússel í dag, at umrøða harðari eftiirlit á markunum

Ráðharrar í ES londunum koma í dag saman á fundi at umrøða hert eftirlit á markunum millum londini í evropeiska samveldinum

Sigmar Bláberg

Bjarni Mohr

20.11.2015 - 10:37

Betri eftirlit skal vera við fólki sum koma til ES londini. Samstundis skulu londini leggja størri dent á at upplýsa hvørt annað, um ivamál stinga seg upp.

Ráðharrarnir skulu taka avgerð um at økja trygdina tá fólk koma inn í Schengen-økið, eisini tá talan er um borgarar í ES londunum. Tað vil siga at frælsi rætturin til at ferðast í Schengen-økinum verður skerdur.

Tað hevur við sær, at borgarar í ES londunum skulu vísa pass, tá tey ferðast í Schengen-økinum, og er nakar ivi, so skulu tey eisini kunna kannast ígjøgnum teldu.

Europeiska løgreglan, Europol, skal eisini senda fólk til økini, har neyðugt er við serliga strongum eftirliti, tað er har sum flest flóttafólk og tilflytarar koma til samveldið. Ætlanin er at skráseta øll sum ferðast við flogfari til ella út ES, og fólk sum ferðast í samveldinum.