Kann elva til diplomatiska kreppu

Tað kann elva til eina diplomatiska kreppu millum bæði londini, at Turkaland hevur skotið eitt russiskt stríðsflogfar niður.

Álopið er sum at stinga Russland í bakið, sigur Putin sambært tíðindastovuni AP. Russiski forsetin sigur, at flogfarið varð skotið niður fýra kilometrar frá turkiska markinum.

Hinvegin heldur Turkaland uppá, at flogfarið var inni í turkiskum loftrumi og varð ávarað 10 ferðir, áðrenn eitt turkiskt F16-flogfar skeyt tað niður. Flogfarið datt niður í Sýria, og eldur kom í.

SÍ EISINI Sí upptøkuna: Russiskt flogfar skotið niður

Turkiski forsætisráðharrin sigur, at Turkland hevur rætt til at svara aftur, um onkur ger seg inn á turkiskt loftrúm, til tess at verja landsins trygd.

Báðir flogskipararnir á russiska flogfarinum skutu seg úr flogfarinum. Óváttað tíðindi siga, at flogskipararnir báðir doyðu.

NATO hevur boðsent limalondunum til snarfundar í dag. Tað er fyrstu ferð síðani fimmtiárini, at eitt limaland í NATO hevur skotið eitt russiskt ella sovjettiskt flogfar niður.