Flogskiparar kunnu ábyrgjast fyri flogvanlukku

Tað vóru mistøk hjá flogskiparunum og tekniskir trupulleikar við flogfarinum, sum 28. desember í fjør fingu eitt flogfar hjá Air Asia at detta niður, tá tað var á veg úr Surabaya í Indonesia til Singapore.

162 fólk vóru við flogfarinum, og eingin kom frá hendingini á lívi. Frágreiðingin um hendingina varð almannakunngjørd í gjár.

Skipanir gjørdu vart við brek frammanundan

Tað vóru fleiri trupulleikar við útgerðini, og tá flogskipararnir høvdu fingið fleiri fráboðanir um tekniskt brek, tóku teir avgerð um at sláa automatisku stýringina frá, meðan teir ætlaðu at umvæla trupulleikarnar.

Men tað var lættari sagt enn gjørt, tí trupulleikar vóru við fleiri loddingum, hava kanningar víst. Handfaringin av støðuni var ikki nóg góð, og tað hevði við sær, at flogfarið datt niður, stendur í frágreiðingini.

Eftirlitið við flogførum í Indonesia er somikið vánaligt, at ES hevur noktað fleiri flogfeløgunum at flúgva til Evropa.