Fyrsta kvinnan vald í Saudi Arabia

Ein kvinna er fyri fyrstu ferð vald inn í politikk í Saudi Arabia. Tað skrivar AFP-tíðindastovan, sum endurgevur formannin fyri almennu valnevndina í landinum, Osama al-Bar, sum keldu.

Kvinnan, Salma bint Hizab al-Oteibi, hevur sambært AFP vunnið sess í Mekka á søguliga lokal-valinum í gjár.

Saudi-arabiska tíðindastovan, SPA, skrivar, at hon er vald í Madrakah-býarpartinum.

Val var ígjár í Saudi-Arabia, har kvinnur fyri fyrstu ferð sluppu á val, - bæði sum veljarar og sum uppstillað valevni.

Tilsamans høvdu 978 kvinnur skrásett seg sum valevni, meðan 5.938 menn vóru uppstillaðir, skrivar BBC.

Sambært Saudi-arabiskum myndugleikum høvdu umleið 130.000 kvinnur valrætt til valið við at skráseta seg. Tað sama er galdandi fyri umleið 1,35 miljónir mannfólk.

Konservativa kongsdømi er, sambært AFP-tíðindastovuni, tað síðsta í heiminum, har tað til í dag bert hava verið menn, sum eru slopnir at atkvøða.

Valrætturn hjá kvinnum verður í Saudi Arabia bert hildið at verða lítið framstig í einum landi, har kvinnur framvegis ikki hava loyvi at kyra bil, og skulu fjala andlit og alt, tá tær ferðast uttanfyri heimið.

Valini hava heldur ongan serligan týdning, tí framvegis eru avmarkingar fyri valunum. Kvinnur sleppa ikki einsamallar á val, men maðurin skal fylgja teimum og fara við inn í klivan, har tær skulu greiða atkvøðu. Og kvinnurnar, sum eru uppstillaðar, mugu bert føra valstríð millum kvinnur.

Kongsdømið loyvir tó ikki møguliga "vandamiklum" kvinnum at stilla upp.

Millum annað varð Loujain Hathloul noktað at stilla upp, tí hon fyrr er dømd fyri at hava koyrt bil.

Ein annar kvinnuligur politikari, Nassima Al-Sadah, er eisini útihýst. Hon er mannarættindastríðskvinna og er útbúgvin á altjóða demokratiska instituttinum, men var tikin av listanum, skrivar Ritzau.