Eftirlønaraldurin í Grønlandi hækkar

Tað hevur grønlendska Landstingið samtykt. Men hóast pensjónsaldurin hækkar tvey ár næstu árini, er hetta ikki nóg mikið, heldur flokkurin, Demokratarnir.

- Vit kunnu síggja á framskrivingunum í fólkatalinum, at tað er neyðugt at hækka pensjónsaldurin enn meira, sigur virkandi forkvinnan fyri Demokratarnar, Randi Vestergaard Evaldsen, sambært Sermitsiaq.

Ynskja betri viðurskifti til tey gomlu

Flokkurin sigur, at talið á eldri borgarum økist í hvørjum. Hetta merkir, at útreiðslurnar til eldraøkið vaksa.

Samstundis ynskja fólk, at ábøtur skulu gerast á viðurskiftini hjá eldri borgarum. Og hetta kann bera gerast við at hækka pensjónsaldurin.

- Vit halda, at tað mest erliga hevði verið beinanvegin at samtykt eina aldurspensjónstrappu, so aldurin hækkar upp í 68 ár í 2024, til 69 ár í 2027 og upp í 70 ár í 2030, sigur Randi Vestergaard Evaldsen.

Demokratarnir standa einsamallir

Demokratarnir eru ein av teimum trimum samgonguflokkinum í Grønlandi. Hinir flokkarnir eru Siumut og Atassut.

Hjá Demokratunum ásanna tey, at flokkurin stendur rættiliga einsamallur um hesa áskoðanina, og at tey fyribils mugu góðtaka, at tey ikki kunnu savna meiriluta um at hækka pensjónsaldurin enn meira.

- Hetta hava vit fingið nógvar atfinningar fyri. Men vit halda fast um, at hetta er tað, sum allarhelst fer at henda. Alternativið er, at viðurskiftini hjá pensjónistunum fara at versna, sigur virkandi forkvinnan hjá Demokratunum.