Truplari at fáa politiskt friðskjól í Noregi

Norski ráðharrin í innflytaramálum hevur lagt fram ikki færri enn 40 uppskot, sum gera tað strangari at fáa politiskt friðskjól í Noregi

Ráðharrin í innflytaramálum í noregi hevur lagt fram 40 uppskot, ið gera tað strangari at fáa politiskt friðskjól í Noregi. Herdu lógirnar hava eisini við sær, at tað verður truplari at fáa familjusameining

Johnsigurd Johannesen

Bjarni Mohr

30.12.2015 - 08:39

Sylvi Listhaug, ráðharri í innflytaramálum, sigur, at tey mongu, ið biðja um friðskjól, kunnu fáa avleiðingar fyri norska vælferðarsamfelagið. Uppskotini byggja á semjuna, sum seks flokkar í Stórtinginum gjørdu í november.

Uppskotini hava til endamáls at avmarka talið á teimum, sum biðja um politiskt friðskjól. Í fjør bóðu 11.480 fólk um politiskt friðskjól í Noregi, í ár er talið komið upp á 30.538.

Truplari at fáa familjusameining í Noregi

Norsku útlendingamyndugleikarnir siga, at talið næsta ár kann sveiggja millum 10.000 og 100.000. Umleið ein millión flóttafólk og tilflytarar eru komin til Evropa um Miðjarðarhavið í ár.

Herdu lógirnar hava eisini við sær, at tað verður truplari at fáa familjusameining í Noregi. Tú skalt hava búð í Noregi í fimm ár fyri at fáa varandi uppihaldsloyvi, og størri krøv verða sett til at duga norska málið.

Stjórnin ætlar eisini, at tað skal verða lættari at vísa flóttafólkum burtur á markinum. Uppskotini verða nú send til hoyringar, og tey koma til viðgerðar í Stórtinginum um seks vikur.