Cameron loyvir ráðharrum at atkvøða »nei«

Tað fer at standa ráðharrum í Bretlandi frítt annaðhvørt at føra valstríð fyri ella ímóti í komandi fólkaatkvøðuni um nýggja avtalu við ES ella at kuta við felagsskapin.

Hetta hevur David Cameron, forsætisráðharri, gjørt greitt fyri stjórn síni, skrivar BBC.

Tó sigur hann, at stjórnin - tá nýggj avtala er fingin í lag við ES - fer at gera eitt tilmæli til bretska fólkið um, hvussu tey eiga at atkvøða.

SÍ EISINI Annarhvør breti vil sleppa úr Evropasamveldinum

Men tá tað er gjørt, so kann hvør einstakur ráðharri taka øðrvísi og persónliga støðu og samstundis framvegis verða partur av stjórnini.

Fólkaatkvøðan um, hvørt Bretland skal verða verandi í ES skal haldast áðrenn 2018. Nakrir ráðharrar í stjórnini fara væntandi at mæla til, at Bretland meldar seg úr ES.

BBC skrivar, at um Cameron hevði kravt felags støðu frá allari stjórnini, hevði hann verið noyddur at koyrt fleiri ráðharrar frá, sum hava aðra støðu til ES enn forsætisráðharrin.