Samkynd kunnu nú vígast í kirkjuni

Fólkatingið hevur samtykt, at fólk av sama kyni nú kunnu giftast í kirkjum í Grønlandi. Lógarbroytingin hevur verið ávegis síðan 2014

Við 108 atkvøðum fyri og ongari ímóti hevur danska Fólkatingið samtykt, at pør av sama kyni í Grønlandi kunnu giftast og fáa vælsignilsi frá presti í kirkjuni

Sigrún H. Brend

Bjarni Mohr

21.01.2016 - 16:37

Við 108 atkvøðum fyri og ongari ímóti hevur danska Fólkatingið samtykt, at pør av sama kyni kunnu giftast og fáa vælsignilsi frá presti í eini kirkju, skrivar sermitsiaq.gl

Hetta verður í lógini nevnt homovígslur, kyns-neutralar kirkjuvígslur og ælabogabrúdleyp, fyri at virða tey mongu sløgini av kærleika, sum eru viðurkend í 2015.

Viðgjørt í Landstinginum og Fólkatinginum

Henda lýsingin fevnir til dømis eisini um transseksuel pør, sum ikki eru samkynd. Lógarbroytingin hevur verið ávegis síðan 2014.

Lógin, ið nú er samtykt, varð fyrst samtykt í grønlendska Landstinginum og síðani liðugt viðgjørd í Fólkatinginum í Danmark.

Grønland hevur ikki heimtikið økið fyri familjurætt, og tí er tað Fólkatingið, sum tekur avgerð í málinum, skrivar grønlendska blaðið.