Fyrireika helst nýggja royndarspreinging

Myndir, sum fylgisveinar hava tikið, vísa nógv virksemi við Sohae rakettstøðina í Norðurkorea. Hildið verður, at myndirnar vísa tangabilar lata brennievni í eina rakett. 

Sambært Reuters siga amerikanskar stjórnarkeldur, at rakettin kann verða klár at skjóta mánanáttina. 

Norðurkorea sigur, at rakettin skal skjóta ein fylgisvein til friðarlig endamál út í rúmdina. Norðurkoreanskir myndugleikar hava boðað ST frá, at rakettin verður skotin út millum 8. og 25. februar.

Amerikanar á varðhaldi

Men amerikanska kyrrahavshervaldið er ikki so sannført um, at rakettin hevur friðarlig endamál.

- Eingin skal ivast í, at okkara deildir eru til reiðar at verja USA og okkara sameindu, Suðurkorea og Japan, sigur ein talsmaður fyri amerikanska kyrrahavshervaldið.

Í gjár tosaði Barack Obama, forseti, við kinesiska starvsbróður sín, Xi Jinping, um málið. Sambært Hvítu húsunum eru báðir forsetarnir á einum máli um, at hetta er ágangandi og ávirkar tryggu støðuna í økinum.

Annars hava USA og Kina ikki drigið eina línu í spurninginum, hvussu farast skal fram í viðurskiftunum mótvegis Norðurkorea. Kinesisku leiðararnir siga, at neyðugt er við dialogi, men amerikanarar harafturímóti vilja hava strangari altjóða tiltøk set í verk.