Mótstøðuførar bakteriur ein vaksandi trupulleiki

Tilburðirnir við mótstøðuføru bakteriuni, VRE, á Landssjúkrahúsinum veksur alsamt, og talið av nýggjum tilburðum økist eisini hvørja viku.

Tíggju mánaðir eftir at fyrstu tilburðirnir vórðu staðfestir, er talið komið upp á 105. Tað er 47 tilburðir aftrat síðan hálvan desember, tá 58 tilburðir vóru skrásettir.

Útbrotið, sum Landssjúkrahúsið hevði vónað at fingið tamarhald á, er nú ein varandi støða, sigur Naina Túgvustein, varastjóri á Landssjúkrahúsinum.

Allir sjúklingar verða kannaðir

Mótstøðuføra bakterian, VRE, hevur fingið innivist á Landssjúkrahúsinum. Alt verður gjørt fyri at fyribyrgja, so smittan ikki breiðir seg uppaftur meira.

Seinastu tríggjar mánaðirnar hevur Landsjúkrahúsið kannað allar sjúklingar, ið koma og fara av sjúkrahúsinum, fyri VRE-bakteriuna.

Smittan er bara at finna inni á Landsjúkrahúsinum. Tískil skulu fólk einans kannast um tey koma úr Danmark, er niðurstøðan.

Reinførið alt at siga

Umleið helvtin av øllum tilburðum verður staðfest hjá sjúklingum, ið koma úr Danmark. Mótstøðuføra bakterian er bara vandamikil fyri fólk, ið frammanundan eru illa fyri.

- Tað er umráðandi at vaska sær væl um hendurnar, og annars fylgja mannagongdini á sjúkrahúsinum, sigur Naina Túgvustein.

Tað er sera umráðandi, at tey, ið hava sína dagligu gongd á Landssjúkrahúsinum, hava reinførið í huga, sigur varastjórin á Landssjúkrahúsinum.