Arbeiða enn við at gera fólkaheilsustovn

Karsten Hansen, sum var landsstýrismaður í heilsumálum í undanfarnu samgongu, gjørdi eitt lógaruppskot um Fólkaheilsustovn. Tað varð sent til hoyringar síðst í januar í fjør, men kom ikki í Løgtingið.

Karsten Hansen ætlaði, at lógin um Fólkaheilsustovn skuldi koma í staðin fyri lógina um Fólkaheilsuráð, sum er frá árinum 2000. Deildin fyri arbeiðs- og almannaheilsu og Fólkaheilsuráðið skuldu leggjast saman í Fólkaheilsustovnin.

SÍ EISINI Føroyar fáa kanska ein Fólkaheilsustovn

Virkisøkið hjá Fólkaheilsustovninum skuldi sambært lógaruppskotinum vera tríbýtt: fólkaheilsueygleiðing, gransking og fyribyrging.

Sirið Stenberg sigur, at ætlanin um Fólkaheilsustovnin er til enn. Hon sigur, at ætlanin er at hava ráðstevnu í heyst um fólkaheilsu, har ætlanin er at lata eina fólkaheilsuvirðisløn.