Óvist hví virðið hækkaði so nógv

Føroyska oljufelagið, Atlantic Petroleum, veit ikki, hví só stórur áhugi hevur verið í gjár og í dag fyri at keypa partabrøv hjá felagnum

Partabrævið hjá Atlantic Petroleum fór í gjár brádliga at fáa áhuga millum íleggjarar á keypsskálunum í Keypmannahavn og í Oslo

Sigrún H. Brend

Bjarni Mohr

08.03.2016 - 17:09

Í gjár fór partabrævið hjá Atlantic Petroleum brádliga at fáa áhuga millum íleggjarar á keypsskálunum í Keypmannahavn og í Oslo. Tað skrivar oljan.fo

Stutt eftir, at keypsskálin í Oslo lat upp vaks Atlantic Petroleum við 295 prosentum í virði. Tí vildi keypsskálin í Oslo hava at vita um nakað serligt var á vási.

Keyp og søla steðgað eina løtu

Vøksturin var so ógvusligur í morgun, at leiðslan á Oslo Børs steðgaði keypi og sølu av føroyska partabrævinum, meðan kannað varð, um nakað óvanligt er.

Nakað seinni slepti keypsskálin í Oslo aftur leystum partabrævinum til keyp og sølu. Ben Arbabo, stjóri í Atlantic Petroleum, hevur onga frágreiðing fyri stóra áhugan.

- Eg veit ikki, hvør orsøkin er. Seinasta børfráboðan okkara var 1. mars, og tá boðaðu vit frá, at ársroknskapurin er útsettur eina viku, til 30. mars. Og tað fær onga sølu at vaksa, sigur Ben Arabo.