Hann bleiv 90 ár: »Fimti beatlin« deyður

George Martin, fimti beatlin, sum hann eisini varð nevndur, er deyður, skriva útlendskir miðlar í morgun.

Tað var ikki fyrr enn beatlarnir hittu George Martin í 1962, at verulig gongd kom á geva plátur út. Eisini hann ivaðist, um nøkur framtíð var í The Beatles.

Men George Martin sá møguleikar í John Lennon, Paul McCartney, George Harrison og Ringo Starr, og teir sluppu at royna seg.

Ein tann týdningarmesti framleiðarin

Avgerðin vísti seg at verða røtt, og George Martin verður í søgubókunum nevndur sum kanska týdningarmesti tónleikaframleiðari yvirhøvur.

George Martin framleiddi 30 sangir, sum gjørdust nummar eitt á hitlistunum í Onglandi og 23 í USA.

Seinasta lagið, George Martin framleiddi, og sum fekk eitt fyrsta pláss, var Goodbye Englands Rose, sum Elton John skrivaði og framførdi, tá Diana prinsessa fór til gravar.