Fríðborg seld og sleppur nú at royna eftir krabba

Líkt er til, at Fríðborg nú endiliga sleppur at royna eftir krabba. 

Síðst í apríl skrivaði Portal.fo, at Fríðborg var seld til Noregs.

Og nú skrivar Fiskerforum.dk, at føroyingarnir, sum áttu Fríðborg, eru við í norska felagnum Trol Drift í Tromsø, sum hevur keypt Fríðborg.

Fríðborg fær ikki bara nýggjar eigarar, men eisini nýtt navn. Skipið skal eita Polar Star.

Norska kvotan

Polar Star skal fiska av norsku krabbakvotuni.  

Fríðborg fekk í fjør vár tilsøgn um føroyskt fiskiloyvi, men tað var við fyrivarni.

Og tilsøgnin varð tikin aftur, tá fyrivarnið bleiv virkið.

Ógreið støða

Viðurskiftini millum føroyskar og russiskar myndugleikar og millum føroyskar og norskar myndugleikar um føroyska roynd eftir krabba í Barentshavinum eru ikki greið.

Tí vildi landsstýrið ikki loyva Fríðborg í Smoguna eftir krabba.

Partafelagið Fríðborg í Havn, sum átti rækjutrolaran við sama navni, keypti í fjør eitt skip úr Íslandi. Skipið er síðani riggað til at royna eftir krabba, men hevur ligið síðani.

Skipið gjørdi tó eina roynd á Ytra banka undir Føroyum í nakrar dagar í desember í fjør fyri at royna útgerðina.