Cliff Richard-skuldsetingar handaðar ákæruvaldinum

Sambært Sky News váttar eitt talsfólk fyri bretska ákæruvaldið, at øll prógvini, sum løgreglan í South Yorkshire hevur savnað saman í málinum, nú eru handað ákæruvaldinum.

- Vit fara nú at gjøgnumganga alt tilfarið væl og virðiliga í eini roynd at fáa greiði á, um haldgóð prógv finnast fyri at taka málið upp til dóms, sigur talsmaðurin fyri bretska ákæruvaldið.

Ein talskvinna fyri løgregluna í South Yorkshire váttaði somuleiðis fyri bretskum miðlum, at prógvini í sambandi við skuldsetingar móti einum 75 ára gomlum manni um eitt eldri mál um kynsligan ágang nú er handað ákæruvaldinum.  

Íspunnið

75 ára gamli Cliff Richard, sum kemur til Føroya í summar at syngja á ársins Summarfestivali, varð avhoyrdur í bæði 2014 og 2015.

Tað var í sambandi við skuldsetingar um kynsligan ágang móti einum drongi undir 16 ár, umframt at hús hansara varð rannsakað. 

Umboðsmaðurin hjá Cliff Richard segði tá, at skuldsetingarnar vóru íspunnar, og at Cliff Richard fór framhaldandi at samstarva við løgregluna um málið.