Hava funnið vrakpetti av flogfarinum

Egyptiski herurin upplýsir, at vrakpetti eru funnin av flogfarinum hjá EgyptAir, sum hvarv í gjáranáttina, skrivar Reuters.

Ein talsmaður fyri egyptiska herin sigur, at egyptisk flogfør og herskip hava funnið vrakpetti og eisini onkrar lutir hjá ferðafólki umleið 150 fjórðingar norðan fyri egyptiska havnarbýin Alexandria.

Hildið verður fram at leita eftir svørtu kassunum í flogfarinum. 

Eisini EgyptAir hevur váttað, at vrakpetti er funnin. 

Sýnir samkenslu

Egyptiski forsetin, al-Sisi, hevur sýnt samkenslu við avvarðandi hjá teimum, sum vóru við flogfarinum.

66 fólk vóru við flogfarinum, sum hvarv, tá tað var á veg úr París til Kairo gjáranáttina.

Skip úr Egyptalandi, Fraklandi, Grikkalandi og Bretlandi leita eftir vrakinum av flogfarinum í Miðjarðarhavinum. 

Kanningarfólk úr Fraklandi og Bretlandi eru eisini komin til Egyptalands at hjálpa myndugleikunum at kanna, hví flogfarið datt niður.