Lív verður nú einskilt

Lógin um einskiljingina kom í gildi í mai 2006, og 1.september í ár verður einskiljingin framd.
Í mai 2011 vildi BankNordik keypa helvtina av Lív, men tá avtornaði, tók bankin seg aftur.

Í mars 2012 fóru fakfeløgini undir at fyrireika seg til at keypa helvtina av Lív, og fyrst í mai í 2012 góvu 23 fakfeløg landsstýrinum eitt tilboð. Tilboðið var 35 mió. kr., tað sama sum BankNordik bjóðaði. Og 14.desember í 2012 undirskrivaðu 18 fakfeløg í P/f Fakfelag sáttmála við Vinnumálaráðið um at keypa helvtina av partabrøvunum í Føroya Lívstrygging fyri 35 milliónir krónur.

Men ikki fyrr enn fyrst í juni í ár góðkendu Tryggingareftirlitið og Tryggingarráðið sáttmálan millum Uttanríkis- og vinnumálaráðið og fakfeløgini í P/f Fakfelag um at keypa upp í 50 prosent av partapeninginum í P/F Lív Holding. 
Samstundis er avhendingarsáttmálin um 50 prosent av partapeninginum til Ognarfelagið Lív góðkendur. 

Men landsstýrið kann tó ikki taka pengar fyri Lív uttan loyvi frá løgtinginum.

Tí kemur eitt uppskot um eykajáttanarlóg í tingið beint eftir ólavsøku, har landsstýriskvinnan í fíggjarmálum biður um loyvi til at inntøkuføra pengar fyri Lív.
Í fyrsta umfari rindar P/f Fakfelag fyri tveir triðingar av helvtini av Lív, 23,33 mió. krónur

Og teir pengarnir fara í Búskapargrunnin, sigur Kristina Háfoss, landsstýriskvinna.