Ongin streymur í Hvalba og Sandvík

Stórir partar av Suðuroynni mistu streymin i nátt.

Tvær útgangandi linjur frá Tvøroyri koblaðu út. Tað eyðnaðist at leggja linjuni til Porkeris um aftur, men trupulleikin við linjuni til Hvalba og Sandvík bleiv ikki loystur.

Finn Jakobsen, deildarleiðari fyri elnetið hjá SEV, sigur við Kringvarpið klokkan 10, at linjumenn hjá SEV hava verið og roynt at loysa trupulleikin, men tað eyðnaðist ikki, tí vindurin var ov nógvur.

Tað er neyðugt at fara upp í SEV-pelarnar at loysa trupulleikin, og tað er trupult, tá tað er so nógvur vindur. 

Smærri streymslit vóru eisini í nátt í Norðdepli og á Streymoyarlinjuni. Men har kom streymurin aftur eftir nøkrum fáum minuttum.