Nýggjur leki avdúkar skattaskjól í Bahamas

Altjóða journalistiska samstarvið, ICIJ, hevur aftur samskipað ein stóran altjóða leka av upplýsingum úr skattaskjóli, hesa ferð úr Bahamaoyggjunum.

Onkur kelda hevur likið meira enn 1,3 milliónir skjøl úr felagsskrásetingini í Bahamas til týska blaðið, Süddeutsche Zeitung.

Skjølini snúgva seg um meira enn 175.000 fyritøkur, og týska blaðið er - sum tá stóri lekin var úr Panama - farið í samstarv við altjóða felagsskapin fyri kannandi journalistar, ICIJ, um at viðgera skjølini og gera fjølmiðlasøgur úr teimum.

Fjølmiðlar hava fingið atgongd til pappírini

Lekin fevnir um eitt nú nøvn á nevndarlimum og inngjøld fyri skrásetingaravgjøld, men skjøl eru ikki um sjálvt virksemið í einstøku fyritøkunum, sum eru skrásettar í Bahamas.

Øll nøvnini í nýggja lekanum eru løgd afturat almenna dátugrunninum hjá ICIJ, har skjøl eisini eru frá Panamalekanum fyrr í ár og Off Shore-lekanum frá 2013.

Áhugað kunnu leita í dátugrunninum á heimasíðuni icij.org. Sum fyrr hava einstakir fjølmiðlar í útvaldum londum fingið lut í skjølunum til at gera søgur úr. Í Danmark er talan um Danmarks Radio og Politiken.

Fleiri danskar fyritøkur nevndar

Bahamas er oyggjaland, sum liggur í ein útsynning úr amerikansska statinum Florida. Í mong ár hava Bahamaoyggjarnar verið lýstar sum skattaskjól, ið gevur almenninginum sera avmarkað innlit í upplýsingar um fyritøkurnar, sum eru skrásettar har.

Politiken skrivar, at teirra kanningar av Bahamas-lekanum hava víst, at nógvar danskar fyritøkur, serliga reiðarí, eru ella hava verið skrásett í Bahamaoyggjunum. Til dømis er alment kent, at eitt felag í Bahamas eigur tað stóra danska reiðaríið, Clipper.

Lekin úr Bahamas vísir, at Clipper hevur samband við næstan 200 ymisk feløg, sum eru skrásett í Bahamaoyggjunum, skrivar Politiken.