Streymurin kanska bíligari

Nevndin í SEV mælir til at lækka streymprísin á nýggjárinum. Tekur aðalfundurin undir við uppskotinum, verður streymurin bíligari á nýggjárinum

Tekur aðalfundurin hjá SEV undir við tilmælinum frá nevndini, lækkar streymprísurin á nýggjárinum við umleið fimm oyrum

Bjarni Mohr

07.10.2016 - 09:57

- Tað er tann góða fíggjarliga støðan hjá SEV, ið er orsøk til uppskotið, um at lækka prísin, sigur Jákup Suni Lauritsen, nevndarformaður í SEV, sambært útvarpinum.

Fíggjarliga støðan hjá SEV kann koma tær til góðar, tí SEV fer at mæla aðalfundinum til, at lækka prísin við umleið fimm oyrum fyri kilowatttíman.

Kostar SEV 15 milliónir

Tað fer at kosta SEV 15 milliónir krónur í mistum inntøkum komandi fíggjarár. Men Jákup Suni Lauritsen væntar, at aðalfundurin fer at lurta eftir tilmælinum.

- Í síðsta enda er tað aðalfundurin, sum avger tað. Men eg vænti, eigararnir fara at fylgja tilmælinum frá okkum (nevndini, red.) sigur Jákup Suni Lauritsen, nevndarformaður.

SEV hevur avgjørt at útseta ætlanina um at byggja nýtt høvuðssæti. Men tað er ikki orsøkin, at streymprísurin lækkar, sigur Jákup Suni Lauritsen við útvarpið.