Royna at skipa stjórn í Íslandi

Fimm av sjey flokkum í Altinginum hittust aftur klokkan eitt í dag í royndini at skipa stjórn eftir valið 29. oktober.

Forsetin bað mikudagin Katrínu Jakobsdóttur, forkvinnu í næst størsta flokkinum, teimum Vinstru grønu, um at royna at skipa stjórn.

Hon hevði fund í gjár við allar flokkar uttan teir, sum eru í gomlu stjórnini, Framsóknarflokkin og Sjálvstæðisflokkin.

Hava góðar vónir

Forsetin og Katrín Jakobsdóttir vóru samd um, at tað eigur ikki at ganga alt ov long tíð við at skipa nýggja stjórn.

Semjast teir fimm flokkarnir, hevur stjórnin 34 av 63 tinglimum. Vanliga eru bara tveir flokkar í ríkisstjórnini í Íslandi.

Flokkarnir, sum nú royna at skipa stjórn, hava góðar vónir, og eftir fundin í dag verður møguliga greitt, um tað verður egg ella ungi.