Brexit nærkast bretum

Tá byrjar tilgongdin hjá bretum at fara úr ES. Tey boðini hevur forsetin í ES, Donald Tusk, fyrrapartin fingið frá bretska ES-sendiharranum. Tað var í fjørsummar at ein meiriluti av bretska fólkinum atkvøddi fyri at Bretland skal fara úr ES.

Úrslitið av atkvøðugreiðsluni var óvæntað, og táverandi bretski forsætisráðharrin valdi at leggja frá sær, tí hann hevði heitt á fólkið um at atkvøða fyri at Bretland varð verandi í ES.

Theresa May, sum tók við sum forsætisráðharri í fjørheyst, boðaði alt fyri eitt frá, at hon fór undir samráðingar við ES um framtíðina.

Eftir at hon hevur sett grein 50 í Lissabon-sáttmálanum í verk, hava partarnir tvey ár til at samráðast um eina loysn, og hvussu framtíðar viðurskiftini verða ímillum Bretland og restina av ES.