Mest skal smíða havrannsóknarskipið

Nýggja havrannsóknarskipið skal vera liðugt í 2020, og skipasmiðjan Mest skal smíða skipið.

Tað verður upplýst í fylgiskjølum frá Fiskimálaráðnum til løgmansrøðuna.

Havrannsóknarskipið fer at kosta 300 milliónir kr.

Men neyðugt er fara í løgtingið við einum nýggjum uppskoti um størri játtan til verkætlanina, tí uppskotið, sum lá í tinginum, datt burtur, tá tingið varð sent til hús.

22 mió. kr. í stuðli til Mest

Byggikostnaðurin varð mettur til slakar 277 milliónir kr., men haraftrat skal Mest hava góðar 22 milliónir kr. í stuðli úr landskassanum at byggja havrannsóknarskipið.

Sambært lóg um studning til skipasmiðjur eiga skipasmiðjur at fáa átta prosent av sáttmálaprísinum í stuðli.

Tá fíggjarnevndin viðgjørdi málið í farnu tingsetu, fekk hon at vita frá Høgna Hoydal, landsstýrismanni, at tað er ein tryet fyri sáttmálanum millum Mest og Fiskimálaráðið, at Mest fær henda stuðulin.

Og hesum tók fíggjarnevndin undir við.

Men málið datt burtur, tá tingið varð sent til hús, og tí noyðist landsstýrismaðurin í fiskivinnumálum at koma aftur í tingið við uppskoti um størri játtan til til havrannsóknarskipið.