Irma hevur kós móti Florida

Tropiska ódnin Irma er nú yvir Florida-sundinum, millum Florida og Kuba.

Vindferðin er umleið 54 metrar um sekundið, og ódnin er á triðja stigi á ódnarmátaranum.

Irma hevur kós móti oyggjabólkinum Florida Keys, hagar hon kemur tíðliga seinnapartin, okkara tíð.

Ódnarstovnurin í USA sigur, at vindurin har er vaksin nógv fyrrapartin.

Ógreitt um ódnin kemur yvir land

Í kvøld og í nátt hevur Irma kós móti vesturstrondini av Florida, men enn er ógreitt, hvar ódnin kemur inn yvir land, ella um hon yvirhøvur kemur inn yvir Florida. 

Veðurmenninir siga, at í løtuni hevur kós vestan fyri amerikanska statin.

Miami Herald skrivar, at vatnflóð er í pørtum av Miami, og 200.000 fólk hava mist streymin. Fleiri milliónir fólk hava fingið boð um at flyta burtur.

Ódnin José er í løtuni yvir Atlantshavinum. Hon er á fjórða stigi á ódnarmátaranum, tað er upp í 69 metrar sum sekundið, men fer væntandi at linka nakað næsta samdøgrið, siga veðurmenninir.

José kemur neyvan inn yvir land, men verður liggjandi norðan fyri Hispaniola og eystan fyri Bahamas-oyggjarnar næsta samdøgrið.

Tekjur fuku í Kuba

Í Kuba draga tey andan lættan eftir ódnina Irmu.

Hon skrykti trø upp við rót, og tekjur fuku av gistingarhúsum.

Í høvuðsstaðnum Havanna sløktu myndugleikarnir streymin, av trygdarávum.

Umleið 10.000 fólk vórðu flutt burtur, men eingin hevur fingið álvarsaman skaða av ódnini í Kuba.

Tá ódnin var upp á tað harðasta yvir Kuba, var hon á fimta stigi á ódnarmátaranum, tað eru meira enn 69 metrar um sekundið.

So nógvur vindur hevur ikki verið í Kuba síðani 1932.