Nevningating um drápsroynd í Havn

Í februar næsta ár verður nevningating í Føroya rætti um hendingina 6.mai í ár, tá ein ungur maður varð álopin við millum annað øks á vegamótinum Íslandsvegur/Landavegur í Havn.

Tveir menn eru skuldsettir fyri drápsroynd.

Politiið tók menninar, sum tá vóru 21 og 23 ára gamlir, ein tíma eftir álopið. 

Teir hava verið haldsfongslaðir síðani. 

Sendur niður

Annar teirra varð sendur til Danmarkar í dag. Har skal hann vera á einari psykiatrisku deild til nevningatingið byrjar 12.februar.

Mentalkanningin sigur, at maðurin er ikki egnaður at vera í vanligum varðhaldi.

Hann kann heldur ikki vera á Psykiatriska deplinum í Havn, tí haðani kann hann rýma.

Landið hevur átikið sær at gjalda fyri tíðina, sum maðurin er á psykiatriskum stovni í Danmark.