Palestina tekur sendimann heim

Palestinsku myndugleikarnir hava boðað frá, at sendimaður teirra í USA er boðsendur at koma heim. Tað verður gjørt fyri at mótmæla avgerðini hjá Donaldi Trump, forseta, at viðurkenna Jerusalem sum høvuðsstað Ísraels. 

Samstundis boðaði palestinski forsetin Mahmoud Abbas frá, at hann ikki fer at góðtaka nakra amerikanska friðarætlan eftir viðurkenning amerikanska forsetans av Jerusalem sum høvuðsstaði Ísraels.

Eftir fráboðanina hjá Mahmoud Abbas gjørdist aftur ófriðarligt í Gaza geiranum.

Tilsamans hava trettan palestinar latið lív í ófriði eftir fráboðanina hjá Donaldi Trump, forseta. Teir flestu í samanbrestum við ísraelskar trygdardeildir.

ST aðalfundurin hevur samtykt eina áheitan á USA um at ganga frá avgerðini at viðurkenna Jerusalem sum høvuðsstað Ísraels.

Ísrael tók eystara part av Jerusalem í krígnum við arabisku grannalondini í 1967. Ísrael sigur seg ongantíð fara at góðtaka annað enn, at býurin verður verandi ísraelskur - allur, sum hann er.