Demokratar ikki í samgongu

Tað segði forkvinnan í flokkinum, Randi Vestergaard Evaldsen, eftir at hon hitti Kim Kielsen í gjár, skrivar KNR.

Flokkarnir báðir kunnu ikki semjast um øll mál. 

Demokratarnir vilja millum annað lækka inntøkuskattin og partafelagsskattin og leggja niður nevndina, sum ger uppskot um stjórnarskipan.

Demokratarnir ætla nú at vera í andstøðuni í landstinginum og arbeiða saman við hinum í andstøðuni.

Randi Vestergaard Evaldsen sigur tó, at flokkur hennara vil gjarna arbeiða saman við øllum flokkum um nýggja fiskivinnulóg, sum byggir á umstøðurnar í Grønlandi.

Demokratarnir høvdu stóra framgongd á landstingsvalinum í síðstu viku.

Tey fingu 7,7 prosentstig afturat og fingu 19,5 prosent av atkvøðunum. 

Tað gav seks landstingslimir og merkir samstundis, at Demokratarnir eru triði størsti flokkur í Grønlandi. 

Siumut hevur níggju tinglimir og Inuit Ataqatigiit átta.