Trygdarráðið á snarfund eftir samanbrestir

Kuveit, sum í løtuni hevur sæti í trygdarráðnum, hevur biðið um snarfund at viðgera støðuna.

Samanbrestirnir millum palestinar í Gaza og ísraelskar hermenn í gjár vóru teir ringastu síðani 2014, og sjúkrahúskeldur siga, at í minsta lagi 57 palestinarar hava latið lív.

Meira enn 2.700 fólk eru særd.

Í gjár vórðu liðin 70 ár, síðani ísraelska ríkið varð stovnað, og samstundis læt USA sendistovu upp í Jerusalem. USA hevur eisini viðurkent Jerusalem sum ísraelskan høvuðsstað.

ST-sendiharrin hjá Kuveit veit ikki at siga, hvat kemur burtur úr fundinum í trygdarráðnum í dag:

- Vit hava fordømt ófriðin, og nú fáa vit at síggja, hvat trygdarráðið kann gera, sigur hann.

Antonio Guterees, ST-aðalskrivari, er stúrin um gongdina á markinum millum Gaza og Ísrael, og hann hevur heitt á báðar partar um at binda frið.

Funnist verður hvassliga at Ísrael og USA fyri avgerðina um at flyta amerikansku sendistovuna úr Telaviv til Jerusalem.

Franski forsetin, Emmanuel Macron, hevur fordømt Ísrael fyri at fara so harðliga fram móti palestinsku mótmælisfólkunum.

Suðurafrika og Turkaland hevur boðsent sínum sendiharrum í Ísrael um at koma heim, og Turkaland hevur eisini boðsent sendiharra sínum í USA um at koma heim til viðtalu.  

Ísraelski forsætisráðharrin, Benjamin Netanyahu, sigur, at ísraelskir hermenn skutu palestinarar í sjálvverju.

- Øll lond hava skyldu at verja markið, skrivar ísraelski forsætisráðharrin á Twitter í gjárkvøldið.