Mæla til at fella uppskot um fiskivinnunýskipan

Grønlendska arbeiðsgevarafelagið mælir grønlendska landstinginum til at fella uppskotið um nýggja fiskivinnulóg, verður tað lagt framaftur í sama líki sum í heyst.

Tá datt málið burtur, tí val varð útskrivað.

Fyrr í vikuni boðaði landsstýrismaðurin í fiskivinnumálum, Erik Jensen, frá, at hann fer at hava fund við umboð fyri fiskivinnuna um nýggju fiskivinnulógina.

Men landsstýrismaðurin gjørdi samstundis greitt, at grundarlagið undir lógaruppskotinum verður tað sama sum í uppskotinum, sum datt burtur.

Og tað hevur fingið ilt í grønlendska arbeiðsgevarafelagið.

- At fiskimálaráðið ferð eftir ferð tosar um at lurta eftir sjónarmiðunum hjá vinnuni, men kortini ætlar at leggja uppskotið framaftur óbroytt, er ein andsøgn, sigur Brian Buus Pedersen, stjóri í arbeiðsgevarafelagnum.

Arbeiðsgevararnir mæla landstinginum frá at viðgera uppskotið um nýggja fiskivinnulóg, fyrr enn málið er væl og virðliga viðgjørt frammanundan.