- Tíðindi, mentan og ítróttur
400 fólk uppsøgd hjá DR
Danska stjórnin hevur við politiskum stuðli frá Dansk folkeparti gjørt av, at DR skal spara 20 prosent av játtanina næstu fimm árini. Í krónum og oyrum merkir tað, at danski public service stovnurin skal spara umleið 420 milliónir um árið.
Starvsfólk fingu boðini á stórfundi í morgun klokkan 9. 25 stjórar verða eisini uppsagdir.
Tíðindaskrivið frá DR kann lesast her
Sparingin hevur við sær, at leiðslan niðurleggur fleiri rásir og leggur aðrar saman. Tríggjar útvarpsrásir vera spardar burtur. Tær eru P6, P7 og P8. Og fleiri av sjónvarpsrásunum hjá DR verða lagdar saman. DR 3 og DR Ultra vera einans at síggja á netinum. Sum skilst, so raka sparingarnar serliga hart umsitingina og deildina DR Medier, meðan eitt nú tíðindadeildin hjá DR ikki verður skorin nevnivert.
